Ekspatriye

Malgre eliminasyon Inter Miami nan Leagues Cup la aprè defèt li 3-2 devan León, match la pote yon bon nouvèl pou foutbòl ayisyen an. Lovens Delinois kontinye ap jwenn konfyans nan ekip Inter Miami an, apre jèn atakan ayisyen an te jwenn dezyèm titilarizasyon li youn aprè lòt.

Aprè li te kòmanse match kont Monterrey, Delinois te ankò prezan nan onz depa Inter Miami pou fè fas ak León. Jèn Ayisyen an te montre volonte li nan faz ofansif yo, li te menm jwenn yon okazyon pou frape, men tantativ li a pa t fini nan filè.

Delinois te jwe 65 minit anvan antrenè a ranplase li. Menm si li pa t rive make, prezans li kòm titilè nan de dènye match yo montre li kòmanse antre pi plis nan plan ekip premye a.

Pou yon jwè ki t ap evolye sitou ak Inter Miami II, jwenn de titilarizasyon youn aprè lòt nan ekip premye a reprezante yon etap enpòtan nan karyè li. Pèfòmans li ak ekip rezèv la te ede l jwenn opòtinite sa, e kounye a se pou li kontinye travay pou l konsolide plas li.

Inter Miami ka kite Leagues Cup la ak desepsyon, men pou Lovens Delinois, eksperyans sa a kapab sèvi kòm yon premye pa enpòtan. Jèn Ayisyen an ap pran eksperyans, ap jwenn konfyans, epi li kòmanse fè non li nan youn nan ekip ki pi suiv nan MLS la.

Pou foutbòl ayisyen an, pwogresyon Delinois a se yon dosye ki merite anpil atansyon.